Ku wa Gatandatu, tariki ya 17 Gicurasi 2025, kuri College Sainte Marie Reine Kabgayi iherereye mu karere ka Muhanga, habereye umunsi mukuru udasanzwe wahuje abanyeshuri, ababyeyi, abarezi ndetse n’abayobozi b’iri shuri. Uwo munsi wibanze ku bikorwa by’ubusabane birimo Igitambo cya Misa, ibirori n’igihe cyagenewe gusurana.

Misa n’Ibatizwa: Umuhango wuje isengesho n’ibyishimo

Umunsi watangijwe n’Igitambo cya Misa cyatuwe na Padiri Mukuru MUVUNYI Innocent, afatanyije na Musenyeri MALTZARD Ntivuguruzwa. Uyu muhango wabanjirijwe n’isengesho ryimbitse, indirimbo zisingiza Imana, ndetse harimo n’abanyeshuri bahawe isakaramentu ry’Ubatizo. Byari ibyishimo by’ikirenga ku banyeshuri, ababyeyi n’abarezi, bose bishimira intambwe abana bateye mu kwemera.

Ibirori: Ubusabane, umuco n’impano z’abanyeshuri

Nyuma ya Misa hakurikiyeho ibirori bikomeye byitabiriwe n’abayobozi, ababyeyi, abarezi n’abanyeshuri, byayobowe na Teacher Placide Pitty wari MC. Muri ibyo birori, hagaragaye ibikorwa byinshi by’indashyikirwa birimo:

• Umwana wavuze umuvugo wagaragazaga ubuhanga n’urukundo rw’igihugu,
• Itorero “Urusobe” ryagaragaje umuco nyarwanda binyuze mu mbyino, imivugo n’indirimbo gakondo,
• Harmonic Band yacuranze mu buryo bugezweho, ishimisha ababyeyi n’abanyeshuri bose.

Ibi byose byerekanye uburere bwuzuye ishuri ritanga, aho umwana wiga atareka umuco n’indangagaciro z’umuco nyarwanda.

Gusurana: Umwanya wihariye wo guhura n’ababyeyi

Mu gusoza umunsi, ababyeyi bahawe umwanya wo gusura no kuganira n’abana babo, bareba aho bigira, uburyo babayeho, ndetse banaganira n’abarezi babo. Iki gikorwa cyafashije gukomeza ubufatanye hagati y’umuryango n’ishuri mu burere bw’umwana.

Amashusho yose y’uyu munsi mukuru mushobora kuyareba kuri YouTube kuri iyi link:
👉 https://youtu.be/Y_BRezWLRuY

BYATEGUWE KANDI BYATANZWE NA MWIZERWA KAREKEZI Bertrand

Umunyeshuri wo muri S5MCE